RFA, ដោយ ហាស់ សាន
2009-03-16
សមាជិកសភាតំណាងរាស្រ្តពីគណបក្សជំទាស់ដឹកនាំដោយលោក សម រង្ស៊ី បានស្នើនៅថ្ងៃ១៣ មីនា សូមឲ្យលោកនាយករដ្ឋមន្រ្តី ហ៊ុន សែន បំភ្លឺពលរដ្ឋខ្មែរនៅក្នុងរដ្ឋសភាអំពីថវិកាចំណាយសម្រាប់ឆ្នាំ២០០៩ ចំនួន ១.៧៥០លានដុល្លារលើសពីឆ្នាំ២០០៨ ដែលមានតែ ១.៣៧០លានដុល្លារនោះ។
សូមបញ្ជាក់ថា កម្ពុជាក្នុងនាមជាប្រទេសមួយមានទុនបម្រុងទុកក្នុងធនាគារអន្តរជាតិសម្រាប់ទូទាត់សងបំណុល ឬផ្ទេរទៅវិញទៅមកក្នុងជំនួញអន្តរជាតិតែប្រមាណ ២.០០០លានដុល្លារប៉ុណ្ណោះ។
រីឯបំណុលបរទេសដែលកម្ពុជាជំពាក់គេមកទល់នេះ មានចំនួនជាង ២.៥០០លានដុល្លារ។
ការកើនថវិកាចំណាយប្រមាណ ២៨%នេះ សមាជិករដ្ឋសភាចង់ដឹងថា តើចំណាយដូចម្តេច ហើយរកលុយពីប្រភពណាមកបង្រ្គប់ការខ្វះខាត បើសិនជារដ្ឋចំណាយច្រើនលើសពីចំណូលប្រមូលពីពន្ធដារនោះ។
អ្នកតំណាងរាស្រ្ត ជាម យៀប មន្រ្តីជាន់ខ្ពស់គណបក្សកំពុងកាន់អំណាចនិងជាប្រធានគណៈកម្មការសេដ្ឋកិច្ច ហិរញ្ញវត្ថុនិងសវនកម្មរបស់រដ្ឋសភា បានពណ៌នាការគិតគូររបស់មេបក្សរបស់លោក គឺលោកនាយករដ្ឋមន្រ្តី ហ៊ុន សែន ថា ជាអ្នកមានបទពិសោធន៍ដ៏ខ្ពង់ខ្ពស់និងមានវិធានបានចាត់ការទប់ស្កាត់ចំពោះវិបត្តិសេដ្ឋកិច្ច ដែលអាចនាំឲ្យផលប៉ះពាល់ធ្ងន់ធ្ងរដល់កម្ពុជាផង។
លោកបានពន្យល់អំពីការគ្រោងទុកនោះ តាមវិធានការបួនយ៉ាងគឺ តាមគម្រោងជាស្រេចនៃថវិកាបម្រុង ១ភាគ៥របស់ថវិកាជាតិ តាមច្បាប់ដែលបានការអនុញ្ញាតឲ្យនាយករដ្ឋមន្រ្តីអាចខ្ចីប្រាក់ពីបរទេសបានចំនួនប្រមាណជាងបីរយលានដុល្លារ នៅពេលគ្រាអាសន្នម្តងៗ។
លោកឲ្យដឹងនូវចំណុចទីបីថា ប្រទេសផ្តល់ជំនួយឆ្នាំនេះ បានផ្តល់ដល់កម្ពុជានូវចំនួនច្រើនរហូតដល់ទៅជិតមួយពាន់លានដុល្លារ ដែលលើសពាក់កណ្តាលនៃសេចក្តីត្រូវការពិតរបស់កម្ពុជា ហើយនិងលោកឲ្យដឹងអំពីចំណុចទីបួនថា តាមការសន្សំប្រាក់ការរបស់ធនាគារជាតិកម្ពុជាតាំងពីឆ្នាំ១៩៩៦ មកទល់ពេលនេះ រដ្ឋមានប្រាក់ប្រចាំនៅក្នុងធនាគាររហូតដល់ទៅជាងពីរលានដុល្លាររួចជាស្រេចហើយ។
លោក ជាម យៀប មានប្រសាសន៍ដូច្នេះថា ៖ «អ៊ីចឹង ៤ចំណុចហ្នឹង ដែលជាវិធានការរបស់សម្ដេចដែលថាបើសិនជាខ្វះ ឬយ៉ាងណាៗនោះ សម្ដេចលោកអាចបង្វិល ហើយរាយការណ៍ជូនមករដ្ឋសភា ដោយសុំបង្កើតជាសេចក្ដីព្រាងច្បាប់ដើម្បីកែតម្រូវដើម្បីចាយវាយចំមុខព្រួញដែលត្រូវការចាំបាច់»។
នៅពេលសុំបញ្ជាក់អំពីលទ្ធភាពនៃការឆ្លើយបំភ្លឺរបស់លោកនាយករដ្ឋមន្រ្តីពីគណបក្សប្រជាជនរបស់លោក ថានឹងត្រូវឡើងឆ្លើយបំភ្លឺសំណួរតាមលិខិតស្នើពីគណបក្ស សម រង្ស៊ី ឬយ៉ាងណានោះ អ្នកតំណាងរាស្រ្ត ជាម យៀប បានមានប្រសាសន៍ថា វាអាស្រ័យទៅលើការសម្រេចចិត្តរបស់លោកនាយករដ្ឋមន្រ្តីផ្ទាល់។
លោក ជាម យៀប មានប្រសាសន៍បន្ថែមយ៉ាងដូច្នេះ ៖«គណបក្សសមរង្ស៊ីដែលបានលើកឡើងជាសិទ្ធិរបស់គាត់ហើយ ប៉ុន្តែខ្ញុំយល់ឃើញថា ការខ្វល់ខ្វាយរបស់សម្ដេច ក៏ដូចជាការឈ្លាសវៃរបស់សម្ដេច គឺថាមានច្រើនជាងគណបក្សប្រឆាំងដែលបានលើកឡើងទៅទៀត។ អ៊ីចឹងទេ ខ្ញុំឆ្លើយសរុបមកវិញថា ទី១ គឺសម្ដេចលោកអាចឆ្លើយជាលាយលក្ខណ៍អក្សរក៏បាន បើសិន
ាលោកមានពេល លោកមកឆ្លើយចំពោះមុខរបស់រដ្ឋសភា តាមសំណើរបស់គណបក្សសមរង្ស៊ី តាមរយៈប្រធានរដ្ឋសភា។ ទី២ទៀតថា អ្វីៗដែលខ្ញុំលើកឡើងសុទ្ធសឹងជាវិធានការចាំបាច់ ដែលរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខបានរៀបចំរួចរាល់អស់ហើយ»។
គួររំឭកផងដែរថា របាយការណ៍ឃ្លាំមើលរដ្ឋសភា ប្រចាំខែកុម្ភៈរបស់អង្គការខុមហ្វ្រែល ចេញនៅដើមខែមីនានេះ ឲ្យដឹងថា តាំងពីចាប់ផ្តើមអាណត្តិទី៤ រហូតដល់ចប់ខែកុម្ភៈកន្លងទៅ យ៉ាងហោចណាស់ក៏មានលិខិត៤ច្បាប់ដែរ ដែលបានស្នើឡើងដោយគណបក្សប្រឆាំងដើម្បីសុំរាជរដ្ឋាភិបាលឡើងទៅឆ្លើយបំភ្លឺនៅរដ្ឋសភា។
រហូតមកដល់ខែមីនានេះ ពុំមានសេចក្តីឆ្លើយតបណាមួយពីរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ដូចបានតម្រូវដែលមានចែងក្នុងរដ្ឋធម្មនុញ្ញប្រទេសកម្ពុជាមាត្រាទី៩៦ នោះឡើយ។
សូមបញ្ជាក់ថា ពាក្យអង់គ្លេស Special Drawing Rights ឬ SDR ដែលលោក ជាម យាប មានប្រសាសន៍ថា ប្រមុខរដ្ឋាភិបាលមានសិទ្ធិខ្ចីបរទេសយកមកប្រើការនោះ គឺផ្អែកតាមកិច្ចព្រមព្រៀងក្រុងរីយ៉ូដឺហ្សាណេរ៉ូ ឆ្នាំ១៩៦៨ ប្រទេសប្រេហ្ស៊ីលនៅអាមេរិកខាងត្បូង ដែលនិយាយអំពីទ្រព្យធនអន្តរជាតិសម្រាប់ជួយបំពេញការខ្វះខាតក្នុងចំណាយនៃប្រជាជាតិទាំងឡាយជាថ្នូរនឹងធនធានផ្លូវការដែលប្រទេសទាំងនោះ មានក្នុងដៃ ដូចជាមាសនិងលុយដុល្លារ ហើយនិង កូតាខ្ចីប្រាក់របស់ប្រទេសនោះ នៅក្នុងមូលនិធិរូបិយប័ណ្ណអន្តរជាតិ IMF។
ស្មារតីនៃកិច្ចព្រមព្រៀងនោះ គឺសម្រួលដល់ប្រទេសនានាឲ្យមានលទ្ធភាពច្រើនក្នុងការខ្ចីបំណុលគេ៕
http://www.rfa.org/khmer/indepth/pm-asked-to-clarify-increasing-budget-03162009075452.html
Cambodia Economy & Business News 
Leave a comment